Вӧзам лык, «Удмуртлык»!

Ньыль кузя егитъёс, Рома Романов, Саша Егоров, Денис в Сахарных но Вера Степанова, интернетысь «Vkontakte» сайт вылэ пыкиськыса, кылем арлэн пумаз кылдытӥзы «Удмуртлык» бамзэс. Россилэн пӧртэм улосъёсаз но кунгож сьӧрын улӥсьёс та сярысь ӝог тодӥзы. Ма, егит муртэд интернетысь уг пота уго. Вакчи дыр чоже «Удмуртлык» бамын ачиз сярысь вераз ини 120 пала адями. Пӧлазы вань венгръёс, финъёс, Москваын, Санкт-Петербургын дышетскись студентъёс.

— «Удмуртлык» баме пырисьёслы ми ӵектӥськом туала пӧртэм амалъёсты, — шуэ Россиысь Наукая академилэн Урал ёзысьтыз Историяя, кылъя но литературая Удмурт институтысь егит специалист Саша Егоров. — Кин ке учкыны быгатоз, шуом, туспуктэмъёсты, мукетыз — удмурт гуръёсты кылзыны, куинетӥез — форуме пыриськыны, туала улон сярысь малпанъёссэ кисьтыны. Егитъёс пӧрмытозы «Удмуртлык» баме асьсэлэсь видеосюжетъёссэс но пыртыны — соосты адӟозы пӧртэм интыосын улӥсьёс. Кинлэн ке, оло, удмурт дунне пумысен юанъёсыз кылдӥзы, соосты но сётыны луоз та бамын.

«Удмуртлык» бамез кылдытон сярысь малпан нырысь ик чилектэм Алнаш палъёсын вордскем, Ижысь техникая кун университетын дышетскись Рома Романовлэн йыраз (эшъёсыз сое ӟечгес тодо Роман KAZAKofSKY нимтулын). Собере со борды итӥськиллям мукетъёсыз егитъёс но.

— Тани алигес та баммы пыр мыным вазиськиз Ростов-на-Дону городын улӥсь тодмое Анна Ло, — веранзэ азьланьтэ Саша. — Солэн мылкыдыз ӝутскем удмурт кылэз дышетыны, ачим, пе Удмурт шаерын вордскемын ке но, пичи дырысен солэн палэназ улыса, ваньмыз вунӥз ни. Малпасько, «Удмуртлык» пыр удмурт егитъёсын кусып тупатыса, со вордскем кылзэ тодаз ваёз. Та баме пыриськисьёс, интернет пыр гинэ уг эшъясько, соос кемалась ик ӧвӧл нырысетӥ пумиськонзэс радъязы. Ужрад шуныт мылкыдын ортчиз. Кыкетӥ пумиськонзы луоз 31-тӥ январе «Пицца-хаус» кафеын. Отчы пыриськыны мылкыдыз сярысь вераз ни 39 адями. Пуком, ог-огенымы олома пумысен но кенешом, пицца сиём, мыньпотӥз Саша. Тэроз меда пичи кафее сомында адями? Оло, удмурт егитъёслы нимаз кафе но усьтоно ни?!

Елена ТУГАШОВА.

Егитъёсты огазеяз «Удмуртлык». Туспуктэмез А. ЕГОРОВЛЭН.

Удмурт дунне. 2008 ар, 25 январь. № 10–11. 12-тӥ б.